Roskvit – у бізнес: рэбрэндынг сэрвісу комплекснага абслугоўвання нерухомасці ад Fabula Branding

Брыф
Да Fabula Branding звярнулася кампанія «РКлининг», якая працуе ў сферы клінінгу і абслугоўвання буйных аб’ектаў. У партфелі –рытэйл-аб’екты, банкі, офісныя будынкі, салоны сувязі і іншыя камерцыйныя прасторы. Каманда займалася не бытавой уборкай, а складанай сістэмнай працай з нерухомасцю, што патрабуе наладжаных працэсаў, адказнасці і даверу з боку партнёраў.

За 14 гадоў на рынку брэнд сфарміраваўся стыхійна: пра яго добра ведалі праз «сарафаннае радыё», але не праз сэнсы і візуал.
Пры гэтым унутры кампаніі ёсць вялікая каманда супрацоўнікаў — людзей, чыя праца рэдка бывае заўважнай, але без якой немагчыма ўявіць парадак і камфорт. Кліенту было важна правесці рэбрэндынг, які адначасова ўзмоцніць прывабнасць кампаніі для B2B-партнёраў і стане апорай для каманды, дапамагаючы супрацоўнікам адчуваць каштоўнасць сваёй працы і ганарыцца ёй.

Задачы
● пераасэнсаваць брэнд з улікам рэальнага спектру паслуг і стратэгічных амбіцый кампаніі;
● пашырыць успрыманне брэнда за межы клінінгу;
● стварыць моцную і натхняльную айдэнтыку;
● сфарміраваць брэнд, які працуе і на знешнюю рэпутацыю, і на ўнутраную культуру;
● распрацаваць нэйм, камунікацыю і візуальную сістэму, здольныя аб’яднаць людзей і сэнсы.

Даследаванні, аналітыка і аўдыт
Праца пачалася з комплекснага этапу даследаванняў і аналітыкі. Каманда Fabula Branding правяла аўдыт брэнда, унутраных працэсаў і актуальных камунікацый, а таксама прааналізавала рынак, канкурэнтнае асяроддзе, паводзіны B2B-кліентаў і асноўныя трэнды галіны.

Аўдыт паказаў, што кампанія даўно выйшла за межы клінінгу: акрамя ўборкі, яна займаецца інжынерным абслугоўваннем і аутстафінгам.
Гаворка ішла пра комплекснае абслугоўванне нерухомасці, але гэта ніяк не адлюстроўвалася ў назве і камунікацыі. Вынікі аналізу сталі важным момантам усведамлення: за знешне «простымі» паслугамі стаіць вялікая сістэмная праца, сумленнае стаўленне да кліентаў і рэальны ўнёсак у якасць гарадскога асяроддзя. Гэта лягло у аснову новага пазіцыянавання і стала унутранай крыніцай матывацыі для каманды.

Пазіцыянаванне
Fabula Branding прапанавала зрушыць фокус з клінінгавай паслугі на больш шырокую і стратэгічную ролю – сэрвіс комплекснага абслугоўвання нерухомасці.
Так з’явіўся дэскрыптар, які аб’яднаў усе напрамкі бізнесу ў адну лагічную сістэму.

Ключавое пазіцыянаванне сфармулявана як «Калі ўсё ў парадку». Гэтая фраза працуе на некалькіх узроўнях: і як літаральны парадак –чысціня, спраўнасць, дагледжанасць прастор; і як эмацыйны стан – упэўненасць, спакой, адчуванне надзейнасці; і як унутраны пасыл для каманды – калі кожны на сваім месцы, усё сапраўды ў парадку.

HR-брэнд
Асобна было сфармулявана HR-пазіцыянаванне: «Усё пачынаецца з цябе». Яно падкрэслівае асабістую значнасць кожнага супрацоўніка і яго ўнёсак у агульную справу. На аснове ідэі распрацавана гадавая HR-стратэгія: унутраная камунікацыя, матывацыйныя інструменты, развіццё карпаратыўнай культуры і сцэнары ўцягвання супрацоўнікаў.

Рэнеэймінг
Спачатку кліент асцярожна ставіўся да перайменавання: «РКлининг» існаваў шмат гадоў і быў вядомы рынку. Аднак стала відавочна, што назва абмяжоўвае ўспрыманне, звужаючы кампанію да адной паслугі.

Так з’явіўся новы нэйм – Roskvit. Кароткае, светлае і па-беларуску цёплае слова, якое асацыюецца з ростам, развіццём і квітненнем.
Росквіт – гэта пра ўнутраны стан, калі праца дае вынік і змяняе людзей..

Алег Суханосік, CEO кампаніі Roskvit:
«Нэйм стаў для кампаніі паваротным момантам. Ён змяніў не толькі знешні вобраз, але і ўнутранае самаадчуванне каманды. Брэнд перастаў быць «пра ўборку» – ён пачаў гаварыць пра людзей, іх унёсак і іх рост. Менавіта з этапу неймінгу ў кампаніі пачаліся больш глыбокія змены ў кіраўніцтве і культуры».

Слоган і камунікацыя
Слоган «Сіла Росквіту – сіла людзей» арганічна ўбудаваў назву ў камунікацыю і зафіксаваў філасофію брэнда.
Распрацавана вербальная камунікацыя на рускай і беларускай мовах з жывымі і паважлівымі пасланнямі: «Росквіт пачынаецца з цябе», «Лад на працы – лад у жыцці», «Твая праца – вялікая справа!», «Увага да важнага, павага да кожнага», «Новы старт да лепшага жыцця». Гэтыя фразы працуюць і звонку, і ўнутры кампаніі, фарміруючы культуру прызнання і даверу.

Візуальная айдэнтыка
Айдэнтыка пабудавана на ідэі прастаты, цяпла і святла. Лагатып – гэта спалучэнне радковага шрыфтавага напісання нэйма (як знак адкрытасці і дружалюбнасці) і графічнага сімвала, які нагадвае сонца або кветку. Яго пялёсткі сабраныя з памножанага элемента літары r – першай літары назвы, што ўзмацняе цэласнасць вобраза.

Фірмовая палітра заснаваная на камплементарным спалучэнні свежага бэзавага і цёплага жоўтага – колераў росту, энергіі і аптымізму.
Дадатковыя адценні робяць сістэму гнуткай для розных носьбітаў.

Былі распрацаваны і забрэндаваныя карпаратыўныя прэзентацыі, каляндар, дзелавая канцылярыя, прома-прадукцыя, форма супрацоўнікаў і рабочае абсталяванне. Айдэнтыка стала часткай штодзённага жыцця кампаніі.

UX/UI-дызайн сайта
Для Roskvit створаны просты, зразумелы і функцыянальны сайт. Яго задача – структурна і ясна распавесці пра спектр паслуг, падкрэсліць сістэмнасць падыходу і перадаць новы характар брэнда.

Інтэрфейс інтуітыўны, візуальная мова падтрымлівае айдэнтыку, а карыстальніцкі шлях выбудаваны так, каб патэнцыйныя кліенты працаўнікі маглі лёгка атрымаць патрэбную інфармацыю і адчуць маштаб кампаніі.

Вынік
Рэбрэндынг Roskvit – гэта глыбокая трансфармацыя ідэнтычнасці і пераасэнсаванне ролі кампаніі на рынку.
Брэнд атрымаў новае імя, выразнае пазіцыянаванне, моцную візуальную сістэму і камунікацыю, якая гаворыць з павагай, цеплынёй і ўпэўненасцю.

Асобнай часткай праекта стала ўнутраная праца з камандай: для супрацоўнікаў і кіраўніцтва была арганізавана прэзентацыя новага брэнда з удзелам кіруючага партнёра Fabula Branding Дзмітрыя Кашкана і каманды агенцыі. Гэта дазволіла не проста паказаць абноўлены вобраз, але і растлумачыць яго сэнсы і стратэгічную логіку, уцягваючы каманду ў змены..

Дзмітрый Кашкан, кіруючы партнёр Fabula Branding:
«Для нас было важна пражыць гэты праект разам з камандай кліента, прапусціць праз сябе мэты і місію. Прэзентацыя стала момантам сапраўднага дыялогу – пра людзей, пра сэнс працы, якая часта застаецца «за кадрам», але без якой немагчыма нармальнае функцыянаванне горада і бізнесу. Мы рады, што змаглі натхніць каманду і дапамагчы па-новаму ўбачыць сваю ролю. Такія праекты даюць упэўненасць, што брэндынг можа змяняць не толькі вобраз, але і ўнутраны стан кампаніі».